Nunat inuiisa suleqatigiinnerat

Nunat inuiisa kattuffiisa nipaat nunani issittuni silap pissusiata allannguutaasa oqallisigineqarnerini pingaarutilimmik pilersitsiviusumillu inissisimapput. Kattuffik Inuit Circumpolat Council – ICC – nunani issittuni aammalu nunarsuarmi nunat inuiisa suleqatigiinnerannik nukittorsaaniarluni sulisuuvoq, aammalu ukiut ingerlanerini silap pissusiata allannguutaasa sunniutaat annertuumik aallussimallugit. Nunarsuaq eqqarsaatigalugu Nunat Inuiisa Susassaqarfii pillugit Oqalliffik Piujuartussaq aammalu Nunat Inuiisa Pisinnaatitaaffii pillugit Nalunaarut nunat inuiisa akornanni suleqatigiinnermik nukittorsaaqataasimapput.

 

Inuit Circumpolar Council - ICC - nunani issittuni, taakkununngalu kalaallit ilanngullugit, naalakkersuisunik suleqateqarluni sulisuuvoq. Pingaartumik avatangiisit nungusaataanngitsumillu ineriartortitsineq eqqarsaatigalugu apeqqutit kattuffimmit tikinneqartarput, taamatullu Nunani Issittuni Siunnersuisoqatigiinni suliassaqarfik suleqataaffigineqarluni. Nunat tamalaat eqqarsaatigalugit ICC nunat tamalaat akornanni silap pissusia pillugu isumaqatiginninniarnernut nakkutilliisutut peqataasarpoq, aammalu nunani issittuni allannguutit, silap pissusiata allannguutaasa nassatarisaat qanoq iliorluni qaangerneqarsinnaanersut pillugu oqallinnermut ilaasarluni.

 

Nunat inuiisa suleqatigiinnerat aamma nunat issittut qaangerlugit ingerlanneqarpoq, nunarsuarlu eqqarsaatigalugu ilaatigut FN-imi Nunat Inuiisa Susassaqarfii pillugit Oqalliffik Piujuartussaq, 2002-mili atuussimasoq aammalu Nunat Inuiisa Pisinnaatitaaffii pillugit Nalunaarut, 2007-imi FN-imi akuerineqartoq aqqutigalugit malunniutsinneqarsimalluni. Oqalliffik pissutsit nunat inoqqaavinut tunngassuteqartut – soorlu silap pissusiata allannguutai – oqallisigineqarnerinik katersuutsitseqataaffiuvoq. Nalunaarut oqallinnermut tamatumunnga tapertaavoq, taamatullu nunat tamalaat akornanni oqallinnermi, tassungalu ilanngullugu nunat tamalaat silap pissusia pillugu isumaqatiginninniarnerini nunat inuiisa nipaannik nukittortitseqataalluni.

Oprindelige Folks Samarbejde