Naalagaaffeqatigiit

FN-imi silap pissusia pillugu isumaqatigiissutip ataani nunat tamalaat silap pissusia pillugu isumaqatiginninniarnerni Naalagaaffeqatigiit akunnerminni suleqatigiinnerat nukittorsarniarlugu, 2012-imi Kalaallit Nunaata Danmark suleqatigiinnissamut isumaqatigiissuteqarfigaa. Isumaqatigiissuteqarnermi Namminersornerulerneq pillugu Inatsit 2009-meersoq tunngavigineqarpoq, tassanilu Kalaallit Nunaata silap pissusia pillugu isumaqatiginninniarnerni sunniisinnaassusia annertusineqarpoq. Tassalu suleqatigiinnissamut isumaqatigiissut Namminersulerneq pillugu Inatsimmi § 13-ip atorneqarsinnaaneranut assersuutissaavoq siulleq, tassanilu innuttaasunut naalagaaffiup pisussaaffiinut isumaqatigiissuteqarnissamut isumaqatiginninniarnernut tunngatillugu suleqatigiinnissamut isumaqatigiissusiorsinnaaneq periarfissinneqarpoq.

 

Silap pissusianut politikki Kalaallit Nunaanni tiguneqarsimavoq, kisiannili nunat tamalaat akornanni silap pissusia pillugu isumaqatiginninniarnerit nunanut allanut politikkimut tunngasuummata, tamakku Danmarkip Kalaallit Nunaanni Naalakkersuisut suleqatigalugit isumagisarai. Suleqatigiinnissamut isumaqatigiissusiornermi isumaqatiginninniarnerit ingerlanerini paasiniaaffigineqartarnissaq suleqataatinneqarnissarlu, paasissutissanik Kalaallit Nunaannut immikkut soqutiginaatilinnik pissarsisinnaanissaq, kiisalu isumaqatiginninniarnerit nalaanni Kalaallit Nunaata ersarinnerulernissaa qulakkeerneqarput.

 

Kalaallit Nunaat suliani, EU-mi ataatsimut isummanik aalajangersaaffiusuni suleqataasarpoq. Tamanna pingaaruteqarpoq, tassami Danmark silap pissusia pillugu isumaqatiginninniarnerni Europami isumaqatiginninniartartunut ataatsimoortunut ilaasutut isumaqatiginninniartarpoq, tassanilu EU nipi ataasiinnaq atorlugu saqqummiussisarpoq. Tamatuma peqatigisaanik Kalaallit Nunaat EU-mi isummanik isumaqatiginninniarnerniluunniit siunnerfiit akuerineqarsimatillugit, taakkuninnga malinninnissamut pisussaatinneqanngilaq.

 

Suleqatigiinnissamut isumaqatigiissut tamakkiisoq atuarsinnaavat, uani.

Rigsfællesskabet