Nunani issittuni teknologi

Nunani Issittuni Teknologiimut Ilisimatusarfik – ARTEK – tassaavoq ilinniarfik ilisimatusarfillu Sisimiuniittoq, Danmarks Tekniske Universitetip (DTU) ataani inissisimasoq. Ilisimatusarfik 2000-imili atuussimavoq, aammalu 2001-imiilli issittumi ingeniørinik ilinniartitsisarsimalluni. Ilinniartitsinerup saniatigut nunani issittuni teknologiimik ineriartortitsineq ilisimatusarfigineqarpoq, aammalu nunap iluani nunanilu tamalaani suleqatigiinnerit arlallit akuuffigineqarput.

 

Ilisimatusarnermi teknologiip nutaap, nunanut issittunut naleqqussarneqarsimasup ineriartortinnissaa aallunneqarpoq. Pingaartumik suliassaqarfiit ’Sanaartorneq’ aamma ’Avatangiisit Pilersaarusiornerlu’ pingaartinneqarlutik suliarineqarput. ARTEK ilaatigut illumik nukissiuutinik annikitsumik atuisumik sananermi, anorisaat atorlugu misileraanermi kiisalu Knud Rasmussenip Højskoliani Sisimiuniittumi seqernup kissaanik innaallagissiuutinik ikkussuineq pillugu suliniummi tunuliaqutarineqarpoq.

 

ARTEK suliniutaani amerlasuuni nukissiuutinik pitsaasumik atuinissamik aammalu nungusaataanngitsumik atuinissamik siunnerfeqarpoq, taamaalillunilu teknologiit silap pissusianut mingutsitsiviunngitsut Kalaallit Nunaanni pisariaqartitanut naleqqussarlugit ineriartortinneqarnerinut tapertaalluni. Aamma isumalluutissat, nunami annertuumik pissarsiarineqarsinnaasut, soorlu seqernup, anorip erngullu nukingata atorluarneqarnissaat sulissutigineqarpoq. Tamatuma nassatarisaanik gassinik silaannarmik kissakkiartortitsisartunik aniatitsineq annikillisinniarneqarpoq aammalu uuliap tikisinneqartartup pinngitsoorneqarsinnaannginnera killilersorniarneqarluni. Ilisimatusarnerup Kalaallit Nunaata killeqarfiisa avataannut siaruartinneqarnissaa, aammalu teknologiip nutaap nunanut issittunut tamanut iluaqutissanngorlugu ineriartortinneqarnissaa anguniagaavoq.

 

Namminersorlutik Oqartussat Nukissiuutinut Ataavartunut Silallu Pissusianut aningaasaliissutit aqqutigalugit ARTEK-ip suliniutaanut amerlasuunut tapersiisimapput.

ARTEK-ip suliai aammalu issittumi ingeniørit ilinniartitaanerat pillugu annertusunerusumik atuagaqarsinnaavutit, uani.

Taakku saniatigut DTU-p, Nunani Issittuni Suliaqarfiup ataani nunani issittuni teknologiimik suliaqarnera pillugu paasissutissanik annertunerusunik pissarsisinnaavutit, uani.

 

Arktisk Teknologi

Nunani Issittuni Teknologiimut Ilisimatusarfik – ARTEK

Danmarks Tekniske Universitetimi Nunani Issittuni Sulianut Ilisimatusarfik - Polar DTU

Global Weirding

Se flere videoer...