Uumasut

Imaani nunamilu uumasut silap pissusiata allanngutaannit sunnerneqartussaapput. Silap kissarnerulernera, nittaallat nakkartartut allanngornerat aammalu naasoqariaatsit nutaat uumasut, Kalaallit Nunaanni pinngortitamiittunut imartaaniittunullu inooriaasiannut allannguisussaapput. Uumasooqatigiit ilaat sunnernerlugaasussaagaluartut, allat nuttarnermikkut naleqqussarnermikkulluunniit aniguisinnaanissamut periarfissanik nutaanik nassaartartussaapput. Pissutsit allanngorneri aamma umasooqatigiinnik nutaanik ataavartumik imaluunniit piffissani aalajangersimasuni takkuttoqartarneranik kinguneqarsinnaapput.

 

Kalaallit Nunaanni Pinngortitaleriffik Kalaallit Nunaanni uumasunik ilisimatusarnermi annertooq isumagisaraa. Pinngortitalerivimmi Aalisakkat Uumasullu Qaleruallit pillugit immikkoortortaqarpoq aamma Uumasut Miluumasut Timmissallu pillugit immikkoortortaqarpoq. Pingaartumik uumasooqatigiit inuiaqatigiinnut kalaallinut pingaaruteqartut ilisimatusarfigineqarput. Tamatuma nassatarisaanik immami soorlu, raajat, assagiarsuit, saarulliit, qalerallit, kapisillit suluppaakkallu misissuiffigineqarput. Taakkununngattaaq arferit, soorlu arfiviit, qilalukkat qernertat, qipoqqaat tikaagulliusaallu, kiisalu nannut ilaatinneqarput. Pingaartumik nunami umimmaat tuttullu soqutigineqarput. Taakku saniatigut timmissat, soorlu meqqit, appat nattorallillu aallunneqarput. Pinngortitaleriffiup ilisimatusarnermi saniatigut aamma pisortani oqartussaasunut siunnersuisarneq isumagisaraa.

 

Kalaallit Nunaanni Silap Pissusianik ilisimatusarfik uumasooqatigiinnik arlalinnik, soorlu saarullinnik, immap naqqata uumasuinik, tappiorannartunik mikinerusunik – tassungalu ilanngullugu planktoninik – kiisalu tuttunik ilisimatusartuuvoq. Suliani amerlasuut uumasooqatigiit assigiinngitsut maanna siaruarsimaffiinik sumiiffinnut assiliornermut tunngasuupput, aammalu taakku silap allannguutaanut qanoq qisuariartarnerat pitsaanerusumik paasisaqarfiginiarlugu allannguutaasinnaasut malinnaaffigineqarput.

 

Kalaallit Nunaanni ilisimatusarfiit arlallit, soorlu Zackenberg aamma Nuuk, tappiorannartut uumassusillit nakkutigineqarnerinut aammalu tunngaviusunut, silap pissusiinut attuumassuteqartunut aallaavigineqarput. Pilersaarut BioBasis, ilisimatusarfinni marluusuni nassaassaasoq, nunami, tatsini silaannarmilu uummasooqatigiinnik tunngaviusunillu amerlasuunik nalunaarsuiffiusarpoq. Taamatuttaaq MarineBasis atorneqarpoq, tassanili taamaallaat immami pinngortitap ataqatigiinnera uumasullu aallunneqarput.

 

Taakku saniatigut issittup imartaani avatangiisit, Århus Universitetip ataani siunissami uumassusilinnut tunngatillugu ilisimatusarfimmi ilisimatusarfigineqartut pillugit annertunerusumik atuagaqarsinnaavutit, uani.

Dyrelivet