Sila, silap pissusia silaannarlu

Kalaallit Nunaanni silap pissusia allanngoriartorpoq. Imaq silaannarlu kissakkiartorput, aammalu nittaalartarnera annertusiartorpoq, pingaartumik ukiuunerani. Nunap immikkoortuisa assigiinngissutaat annertuujupput, aammalu siunissami allannguutissanik eqqoriaasarnerit annertuunik nalorninartortaqarput. 2005-imiit 2010-imut nunani issittuni kiak aatsaat taama qaffasitsigitillugu uuttorneqarpoq, tamatumalu ersiutaatut aasat sivisunerupput panernerullutillu, aammalu immap sikua sermersuarlu annikillisimavoq1. Allannguutit ingerlaannassapput, aammalu ilisimatusarnikkut tamatuma qanoq pinissaa takussutissiorniarneqarpoq.

 

Suliassaqarfimmi tassani ilisimatusarnerni amerlasuuni misissuinerit aallaavigineqarput, taakkunanilu piffissat sivisuut ingerlanerini silap pissusiisa allanngorarneri malinnaaffigineqarput. Paasissutissat katersorneqartut silap pissusianut najoqqutassianut atorneqarsinnaapput, taamaalillunilu siunissami ineriartornissaq tunngavissaqartumik eqqoriarneqarsinnaavoq. Kisiannili tunngavissat ataqatigiillu amerlasuut suli ilisimaneqanngillat, taamaattumillu ineriartornissamut siumoortumik missiliuinerit annertuumik nalorninartortaqarput.

 

Kalaallit Nunaanni Silap Pissusianik ilisimatusarfik Kalaallit Nunaanni sumiiffinni assigiinngitsuni silap pissusiata allannguutaanik paasinnikkusulluni najukkani nunallu immikkoortuini assigiinngitsuni silap pissusianut najoqqutassianik assigiinngitsunik suliaqarpoq. Ilaatigut silap pissusianut piviusuusaartitsilluni najoqqutassiat pitsaanerulersinniarlugit ineriartortippaat, aammalu ilisimatusarnerit aqqutigalugit allannguutit assigiinngitsut imminnut sunniutaannik paasinninnissaq annertusitinniarneqarluni. Tassunga assersuutitut oqaatigineqarsinnaasoq tassaavoq, immap silaannaallu akornanni CO2-mik sunneeqatigiittarnermi pissutsit silap pissusiata allannguutaanut sunniuteqartumik timitaasigut akuutissatigullu ineriartortarnerinut pingaaruteqartut pillugu misissuineq.

 

Asiaq aamma suliassanik silap pissusianut attuumassuteqartunik arlalissuarnik suliaqarpoq, aammalu ilisimatusarfinni Zackenberg  aamma Nuuk misissuisarnernut pilersaarutinut ilaalluni. Silap pissusianik misissuinermut pilersaarutini, KlimaBasis aamma GeoBasis silaannarmi pissutsit silap pissusianut attuumassuteqartut, nunap naqqa kuuillu, taamatullu silaannaap kissassusia, aputeqartarneq, nunap silaannaallu akornanni gassit silaannarmik kissakkiartortitsisartut sunneeqatigiittarnerat, kiisalu nunamiit erngup tarajoqanngitsup kuuttarnera pillugu misissuinerit arlalissuit ingerlanneqarput.

 

Tamatuma saniatigut uuttortaasarfiit amerlasuut, nittartakkami quppernermi Sermersuaq, Sermit Iigartartut aamma Sermillu Qeqqani Qillerinerit atuarsinnaasatit, aamma kissassutsip nittaallallu ineriartornerinik malinnaapput, aammalu Kalaallit Nunaanni, Danmarkimi nunanilu allani ilisimatusarfinnut annerusunut paasissutissanik pilersuisuullutik.



1 Arctic Monitoring and Assessment Programme, 2011: Snow, Water, Ice and Permafrost in the Arctic. AMAP, Oslo.

Vejr, Klima og Atmosfære

Kalaallit Nunaanni Silap Pissusianik Ilisimatusarfik

Suliat

Danmarkimi Silasiorfimmi Danmarkimi Silap Pissusianik ilisimatusarfik

Silap pissusii nalinginnaasutSilap pissusii sakkortuutSila pillugu toqqorsiviit

Asiaq

Århus Universitetimi Nunanik Issittumiittunik Ilisimatusarfik

Global Weirding

Se flere videoer...