Umiarsuit angallannerat

Kalaallit Nunaata imartaani siku annikilliartorpoq. Silap pissusiata allannguutaasa kingunerisaanik immap kissarnerulernera aasaanerani piffissat sikoqanngiffiusut sivitsorput, aammalu sumiiffiit siornatigut sikuujuartarsimasut ammasalerput. Sikup kinguariartornera nunanit tamalaanit annertuumik eqqumaffigineqarpoq, maannangaarlu ukiualunnut matuma siulianiittunut naleqqiullugu umiarsuit angallattut amerlanerungaatsialerlutik. Ukiuni kingulliunerusuni umiarsuit sinersorlutik takornariartitsisartut amerlinerinut tapertaritillugu, nunap immikkoortuani aatsitassanik piiaanissamut soqutiginninnerup annertunerulernera umiarsuit angallannerulernerinik kinguneqartussatut naatsorsuutigineqarpoq.

 

Kisiannili sikup kinguariartornera nunani issittuni imaatigut angallannermi nutaarsiassatut pitsaasuinnaanngilaq. Tikikkuminassutsip annertunerulernerat, angallaviit nutaat aammalu niuernerup assartuussinerullu annertusiartornera pillugu oqallittoqarnerani, sumiiffimmi umiarsuit nalunaaruteqartalerput, silap pissusiata kissarnerulernerata kingunerisaanik sikut ingerlaartut katersuuttarnerat annertusisimasoq. Taamaalilluni sumiiffimmi imaatigut angalanermi ulorianartorsiorsinnaaneq annertusisimavoq, aammalu sumiiffiit ilaat tikikkuminaassisinnaapput, tamannalu Kalaallit Nunaata imartaani imaatigut angalanermi isumannaassusissamut piumasaqaatinik pinngortitsiviuvoq.

 

Tunup Avannaarsuata aammalu Sullualuup ammarnerisa kingunerisaanik Kalaallit Nunaata sineriaa sinerlugu angallattut amerlissanersut oqallisigineqartorujussuuvoq. Umiarsuit Kalaallit Nunaat killeqqullugu angalasarmata ilumoorpoq, kisiannili sineriammit ungasittarput, taamaattumillu Kalaallit Nunaannut tamatuma isumaqarnera killeqarluni. Umiarsuit Sullualukkoortartussat Island kangeqqullugu ingerlasartussaapput, aammalu umiarsuit – maannamut ikittuinnaasartut – Sullualukkoornissamik kissaateqarsimasinnaasut Kalaallit Nunaata Canadallu akornanni aqqut qiterpiarlugu ingerlasarnissaat naatsorsuutigineqarpoq – tassalu pisuni marluusuni Kalaallit Nunaata sineriaanit ungasingaatsiartukkut.

 

Imarsiornermut Aqutsisoqarfiup, Namminersorlutik Oqartussanit tapersersorneqarluni, Kalaallit Nunaanni imarsiornermut oqartussaasutut suliassat isumagisarai. Nunani Issittuni Isumasioqatigiit, Nunat Tamalaat Imarsiornermi Kattuffiat (IMO) nunanilu issittuni imarsiornermi sullissiviit allat suleqatigalugit, nunap immikkoortuani umiarsuit angallannerinut malittarisassanik inatsisinillu nutaanik ineriartortitsilluni sulisoqarpoq. Aamma Polarkode, nunani issittuni umiarsuit angallannerini isumannaallisaanissamut maleruagassat nunanit tamalaanit pinngitsooratik malinneqartussat ilusilersorneqarlutik suliarineqarput, taamatullu umiarsuarnut, piumasarineqartunik atortoqaratik imaluunniit pisariaqartinneqartunik misilittagaqaratik nunat issittut imartaanni angalasunut piumasaqaatit annertusineqarnissaat kissaatigineqarpoq.

Skibsfart