CSR – Inuussutissarsiornermi Suliniutit

Kalaallit Nunaanni silap pissusianut akisussaaffeqarnissaq suliniuteqarnissarlu eqqartorneqartillugu inuussutissarsiorneq pingaarutilimmik inissisimavoq, pingaartumik suliffissuit, aatsitassarsiornerit aatsitassanillu piiaanerit allat nukimmik annertuumik atuiffiusut annertusiartornerannut atatillugu. Suliffeqarfiit arlallit silap pissusianut politikkinik ersarissunik ilusilersuereerput, aammalu CO2-nik aniatitaminnik annikillititsiniarlutik suliniuteqarput aammalu suliaminni nukissiuutinik atuinermik pitsanngorsaallutik.

 

CSR – imaluunniit Corporate Social Responsibility – suliffeqarfiit inuiaqatigiinnut akisussaaffiinut innersuussutaavoq – tassalu inuussutissarsiornermik ingerlataqartut inuiaqatigiinnut sullissivigisaminnut annertuumik imminnut pisussaaffeqartipput. Kalaallit Nunaanni peqatigiiffik CSR Greenland 2010-mi kalaallit suliffeqarfiisa arlallit akornanni suleqatigiiffittut pilersinneqarpoq. Peqatigiiffiup siunertai silap pissusianit annertunerusumut tunngasuupput, aammalu inuussutissarsiutinik ingerlataqartut nutaanik suliniuteqarnissamut suliassaqarfiillu akimorlugit suleqatigiinnissamut kaammattorneqarnerini pingaarutilittut inissisimalluni.

 

’Clean Greenland – Green Companies’

CSR-Greenland-ip Danmarkimi Nunarsuarmi Pinngortitamut Aningaasaateqarfik, Clean Greenland – Green Companies-imik taaguuteqartoq suleqatigilersimavaa. Suleqatigiinnermi kalaallit suliffeqarfiutaasa toqqartorneqartut avatangiisinut ajornartorsiutinik isumaginnissinnaalernissamut aammalu CO2-nik aniatinneqartunik annikillititsinissamut ilisimasaasa pisinnaasaasalu nukittorsarneqarnissaat siunertarineqarpoq. 

 

Royal Greenland

Royal Greenland Kalaallit Nunaanni suliffeqarfiit namminersortut annersaasa ilagaat, ukiumut 5 milliardingajannik kaaviiaartitaqartartoq, taamaattumillu kalaallit aalisakkerinermik suliffissuaqarnerani sullissisuuvoq pingaarutilik. CSR-imik suliniuteqartut annersaannut ilaasutut suliffeqarfiup aamma gassinik silaannarmik kissakkiartortitsisartunik aniatitsinini killilersorniarpaa. Royal Greenlandip silap pissusianut suliassaqarfimmi suliniutai pillugit annertunerusumik atuagaqarsinnaavutit, uani.

 

Polar Seafood

Polar Seafood Kalaallit Nunaanni aalisakkeriviit annersaata tulleraa, kitaata sineriaani annertuumi tunisassiorfeqartoq aalisariuteqartorlu. Suliffeqarfiup taamatuttaaq umiarsuaatiminit tunisassiorfiutiminillu CO2 aniatinneqartartoq annikillisarpaa. Polar Seafoodip CSR-imik suliaqarnera pillugu annertunerusumik atuagaqarsinnaavutit, uani.

 

Royal Arctic Line

Royal Arctic Line suliffissuuvoq, Kalaallit Nunaannut aamma Kalaallit Nunaanniit nassiussanik assartuisuusoq, kiisalu illoqarfiit akornanni nassiussanik pilersuisuusoq. Imaatigut assartuussineq isorartuumut nioqqutissanik nassiussanillu assartuussisarnertut nukimmik pitsaasumik atuiffiusartutut oqaatigineqarsinnaalluinnaraluartoq, nunami issittumi pissutsit atorlugit amerlanertigut assartuussinissamut pisariaqartitat ikummatissamik annertunerusumik atorfissaqartitsiviusarput. Suliffeqarfiup 2012-imi umiarsuit ikummatissamik atuinermi pitsanngorsaataasut naammagisimaanngilai, taamaattumillu tamatumani 2013-imi pitsanngortitsinissaq sulissutigaa. Royal Arctic Line-p suliniutai pillugit ukiumoortumik nalunaarusiaani annertunerusumik atuagaqarsinnaavutit, uani

 

Air Greenland

Air Greenlandip Kalaallit Nunaanni silaannakkut assartuussinerup annersaa isumagisaraa – silaannakkut assartuussineq, nunakkut assartuussinissamut periarfissaqarnerat pissutigalugu annertulluinnarsinnaasoq, aammalu gassinik silaannarmik kissakkiartortitsisartunik annertuumik aniatitsiviusoq. Suliffeqarfik CO2-mik aniatitsinini killilersorniarlugu suliaqartuuvoq, ilaatigullu suliffeqarfiuvoq, suliffeqarfiit CO2-mik aniatitaminik – tassalu suliffeqarfiup ukiumut qanoq annertutigisumik aniatitaanik – tamanut saqqummiisartut ikittuinnaat ilaat. Air Greenlandip avatangiisit silallu pissusia pillugu suliai pillugit annertunerusumik atuagaqarsinnaavutit, aammalu ukiumoortumik nalunaarutaat, aniatitat allattorsimaffiinik ilaqartoq takusinnaallugu, uani.

CSR - Erhvervslivets Indsats