Annikillisitsiniarluni suliniutit

Kalaallit Nunaanni mingutsitsiviunngitsumik atuineq nukittorsarniarlugu, innuttaasut silap pissusianik ilisimasaqarnerat annertusarniarlugu, aammalu nunami nungusaataannginnerusumik atuineq orninniarlugu aallartitat suliniutillu amerlapput. Kommunini najukkani nungusaataanngitsumik suliniutinik aallartitsisoqartarpoq, taamatullu nunap iluani innuttaasut ataasiakkaat silap pissusianut akornutaanngitsumik iliuuseqartarnerat nukittorsarniarlugu paasititsiniaanernik ingerlatsilluni misiliisoqarpoq. Taakkunani marluusuni ajornartinnagu aniatitat annikillisarneqarnissaat nukissiamillu atuinermik pitsanngorsaanissaq siunnerfigineqarpoq.

 

Najukkani suliniutit

Kommunini najukkani inuiaqatigiit silap pissusianut mingutsitsinngitsumik iliuuseqarnissaasa pissusilersornissaasalu nukittorsarneqarnissaa sulissutigineqarpoq. Qeqqata Kommuniani nungusaataanngitsumik iliuuseqarnissamut takorluukkat sulissutigineqarput, tassanilu nukissiuutinik atuinermik pitsanngorsaataasussat sammineqarput. Imminut aallaaviginissaq aammalu ingerlatsinermi ineriartortitsinermilu qanoq iliorluni nungusaataanngitsumik iliuuseqarnissap siuarsarneqarsinnaaneranut kommuninut allanut assersuutissanik pitsaasunik takutitsinissaq eqqarsaatigineqarpoq. Kommuneqarfik Sermersuumi Silap Pissusiani Nukissiuuteqarnermilu Iliuusissanut Pilersaarummik assingusumik suliaqartoqarpoq. Iliuusissanut Pilersaarut kommunini silap pissusianut nukissiuuteqarnermullu suliniutinut nukittorsaataassaaq, aammalu siunissami aallartitassani suliniutissanilu suliassaqarfiit taakku eqqarsaatigineqarnissaat qulakkeerneqassalluni.

 

Silap Pissusia pillugu Paasititsiniaaneq

Nunami aniatitat annikillisinniarnerini unammilligassanut kikkut tamarmik suleqataanissamut kaammattorneqarnissaat Namminersorlutik Oqartussat anguniagaraat. 2013-imi upernaakkut silap pissusia pillugu paasititsiniaaneq, innuttaasuni amerlasuunut saaffiginnittoq ingerlanneqarpoq. Paasititsiniaaneq quianartunngorlugu ingerlanniarneqarpoq, titartakkallu aviisit ullormut saqqummersartut assigiinngitsut aqqutigalugit saqqummersittarnerisigut innuttaasut ajornartitsinngiffiusuni silap pissusianut akornutaannginnerusumik aammalu uuliamik dieselimillu atuinerannut killilersuiffiusumik eqqarsartalernissamut kajumissaarneqarput. Assersuut uani takusinnaavat: 

 

Klimakampagne KAL