Nukissiuutit ataavartut

Erngup nukinga amerlanertigut Kalaallit Nunaanni nukissiuutinut ataavartunut atasutut siullertut eqqarsaatigineqartarpoq – tamatumunngalu pissutissaqarluarpoq. Kisiannili aallartitat suliniutissallu annikinnerusut maluginiartariaqartut amerlapput. Nunani Issittuni Teknologiimik Ilisimatusarfimmi nunaqarfimmi seqernup kissaanik anorimillu nukissiuutit suliarineqarput, kiisalu Nuummi biilinik innaallagiamoortunik atuisinnaanermut periarfissat Namminersorlutik Oqartussat misissuiffigaat – suliani pineqartuni marluusuni taakkunani Kalaallit Nunaanni nukissiuutinik ataavartunik isumalluutissat pitsaasut atorluarneqarnissaat siunertarineqarpoq.

 

Nunani issittuni teknologi

Nunani Issittuni Teknologiimut Ilisimatusarfik – ARTEK – Sisimiuniittoq Kalaallit Nunaanni teknologiimik nungusaataanngitsumik ineriartortitsinissamik suliaqarpoq. Ilisimatusarfik Danmarks Tekniske Universitet-imut (DTU) atasuuvoq, taannalu ilisimatusarnermi ineriartortitsinermilu suliniutinik arlalissuarnik aallartitsisimavoq, aammalu ilaatigut seqernup kissaanik anorimillu nukissiornermi nungusaataanngitsumillu sanaartornermi isumalluutissanik misissuilluni. Kalaallit Nunaanni seqernup kissaanik nukissiuuteqarnermik atuinissamut periarfissat pitsaasuupput, aammalu seqernup kissaanut teknologiip ineriartortinnissaa siunnerfeqartumik sulissutigineqarpoq.

ARTEKip nittartagaa alakkaraanni takuneqarsinnaasutut Sisimiuni højskolimi seqernup kissaanik innaallagissiuummik ikkussisoqarsimavoq, aammalu suliffeqarfik illoqarfimmi illumik, nukissiamik annikitsumik atuisumik sanasuusimavoq. Uummannami aamma nunaqarfimmi Sarfannguani seqernup kissaanik, anorimik imermillu nukissiuutit atorlugit pilersuinissamut isumalluutit misissorneqarput. Suliniut Namminersorlutik Oqartussat Nukissiuutinut Ataavartunut Silallu Pissusianut Tapiissuteqartarfiannit tapersiiffigineqartarpoq, nukissiuutillu ataavartut atorneqarnerisa annertuseqqinnissaanut isumalluutaavoq, aammalu Kalaallit Nunaata nukissiamik pilersuinermut atatillugu aniatitaanut tamarmiusunut killilersuutaalluni.

 

Biilit innaallagiamoortut

Nuummi biilit innaallagiamoortut amerlinissaannut pissutsit pitsaasuupput. Erngup nukinganik innaallagissiorfiup nukissiaanik sinneruttumik pissarsisoqarsinnaammat, aammalu aqqusernit ataqatigiit killilimmik isorartussuseqarpata, biilit innaallagissamoortut amerlisarnissaannut sorsugassat akuttunngitsumik naammattoorneqartartut Nuummi qaangilertorneqarsinnaapput. Nalunaarusiaq, Biilit Innaallagiamoortut Nuummi qinigassatut 2013-immersoq, illoqarfimmi innallagiamoortunik biilitaarnissamut akimmisaarfiusut nassuiaateqarfigineqarput, aammalu sorsugassat taakku Kalaallit Nunaanni biilinik innaallagiamoortunik siuarsaanissaq eqqarsaatigalugu qanoq iliorluni qaangerneqarsinnaaneri takutinneqarlutik. Biilit innaallagiamoortut 100%-imik CO2-mik aniatitsisuunngillat, aammalu illoqarfimmi pujoralannik aniatitsinermut annikillisitseqataasinnaapput, nunamilu ikummatissanik nunap iluaneersunik pinngitsuuisinnaanermik annertusititseqataasinnaallutik. Biilit innaallagiamoortut biilinut dieselitortunut benziinatortunullu naleqqiullutik silap pissusianut annertuumik iluaqutaasinnaagaluartut, biilit innaallagiamoortut Nuup aqqusernini takussallugit nalinginnaasunngornissaannut ukiualuit ingerlanissaat naatsorsuutigineqartariaqarpoq. Suli suliatigut unammilligassanik aaqqitassanik, aammalu isumalluutinik immikkoortitassanik peqarpoq, kisiannili nalunaarusiap naqinneqarnera Kalaallit Nunaanni silap pissusianut akornutaannginnerusumik biilit angallatilernissaannut alloriarneq siulleq aallartinneqarpoq.

Vedvarende Energi

Nunani Issittuni Teknologiimut Ilisimatusarfik – ARTEK

Global Weirding

Se flere videoer...